注意拎鎖匙前準備: 萬能蘇&燈泡&樽裝水&紙巾

[公屋2022]

當收到物業服務辦事處通知(入伙信)後，戶主 按指定日期及時間前往迎東邨辦理收樓手續。屆時請帶備下列文件：

1. 入伙信
2. 填妥的「申請公屋聲明書」(表格HD88C)，18歲或以上家庭成員必須簽署
3. 戶主本人的身份證正本、其他住戶的身份證/出世紙 (正或副本)
4. 戶主證件相 (5厘米 X 4厘米)兩張

各位街坊可自行按需要預備以下物資驗收單位︰

1. 有顯示燈的萬能蘇頭
   試全屋插頭有冇電 (當然任何輕便的電器用品都可以啦)

2. 釘頭燈泡
   當然係試吓啲燈座有冇電，唔通放閃用咩～

3. 樽裝水一支
   入屋裝水睇來水有冇問題，雜質 - 裝水倒落所有去水位，睇吓有冇淤塞 - 最後水就當然用嚟飲啦，辦手續講緊半日冇走雞 (斷估大家唔係駱駝嚟啩?!)

4. 紙巾 (記緊係乾紙巾，最好有咁薄得咁薄就最好)，或者係報紙都得
   作用︰印吓啲水喉，駁位，睇吓有冇滲水

登記之後， 辦事處職員會先安排大家到單位初步查看記緊為節省時間，只須先看看單位是否合心水就可以，之後還有時間慢慢驗樓
如決定接受編配則返回辦事處辦理，睇完錄影帶講公屋守則之後，等見房署主任檢查「收入聲明書」(HD88C)，沒問題的話就可以簽約完成手續後去繳費處繳交入伙信中所列明的費用 (以現金支付)，包括：

1. 一個月按金 (全長者戶或領取租金援助，同時沒有領取綜合社會保障援助 「綜援」，可申請豁免。)
2. 下月租金
3. 當月租金尾數 (簽約後免租期 14 日後起租)
4. 泥頭費 (全長者戶、綜援及傷殘津貼住戶可申請豁免。完全唔裝修的街坊都要俾錢先，之後主任上門檢查，確認真係冇裝修，先可以申請回水)

交完錢，拎返收據 [記住記住記住 (好重要所以要講三次)，收據唔好扔，好好保留到你搬走的一日，到時收據拎返按金]，就可以交收鎖匙 (包括鐵閘、大門、信箱匙)。之後大家就可以返去單位詳細檢查。設施如有損壞，可填寫「損壞情況報告表」，7 日內交回辦事處以安排執漏及維修

[Angela]

多謝分享, 但想請問, 之後係咪要佢執漏先開始入住OR 裝修架?!

[ckwong]

@angela 你簽約取匙后即刻可以再上樓仔細檢查。有問題寫低交比佢的，會盡快幫你維修好。一定係有問題等佢地整好先開工。