時移世易加上個人際遇，依家諗住排單人公屋。知道單人係計分制，年紀越大越高分。如果我無計/理解錯，大約要去到58歲(?) 先夠分開始安排見主任，之後(再)等派屋。

爬過文，見有人單人排到60即會調去老人隊。一開始申請(參與呢個遊戲)就要遵守規則，要 keep 住人工 & 資產唔過額。但生活係呢個時勢既香港，萬二蚊人工要交租連生活點生存到? 我知坊間好多人有好多唔同做法，呢度唔討論，我只想正正規規咁為自己打算。

我諗到有以下選項：

1. 依家51開始排，我當好好彩58派到屋比我，期間呢7年有職唔升有薪唔加 keep 住萬二(或規定既額)，7年辛辛苦苦過日之後無積蓄咁上樓(之後其實都要交租只係平D)，之後每兩年審查。
2. 唔排住，趁60之前搵得多過規定(起碼可以正常D生活，有病睇私家唔駛請假睇政府)，到60先申請老人單身單位。

問題：
除咗以上兩個選項之外，會唔會有其他選項係我諗唔到既?
同埋排老人單身單位有無咩限制? 大約平均又要排幾耐?
唔知大家會點揀?

先多謝大家時間睇咗咁大篇野，唔好意思。